បាត់ដំបង៖ ភោជនីយដ្ឋាន អូវើរ ថាម (Over time) កន្លែងស្ថិតក្នុងភូមិរំចេក០៥ សង្កាត់រតនៈ ក្រុងបាត់ដំបង ត្រូវបានមន្ទីរទេសចរណ៍ខេត្តសម្រេចបិទអាជីវកម្មបន្ទាប់ពីទីតាំងនេះបានបើកដោយល្មើសនឹងវិធានការរបស់រដ្ឋបាលខេត្ត។

ប្រធានមន្ទីរទេសចរណ៍ខេត្តបាត់ដំបង លោក អ៊ុច អ៊ុភីនីស្សារ៉ា បានឲ្យដឹងថា អាជីវកម្មខាងលើបានបើកដោយគ្មានច្បាប់ គ្មានអជ្ញាបណ្ណ បើកទទួលភ្ញៀវនៅបន្ទប់អាគារជាន់ទី៣ និងទី៤ មានលក្ខណៈជាក្លិប និងថាប់ (Pub) ដោយមានការប្រមូលផ្តុំភ្ញៀវ ពិសារគ្រឿងស្រវឹងក្នុងបន្ទប់ម៉ាស៊ីនត្រជាក់ ប្រគុំភ្លេង និងចាក់ចំរៀងលឺៗដែលខុសទៅនឹងគោលការណ៍របស់សេចក្តីសម្រេចខេត្ត។

ការចុះទៅបិទនេះគឺបន្ទាប់ពី ក្រុមការងារអធិការកិច្ចនៃមន្ទីរទេសចរណ៍ សហការជាមួយកម្លាំងកងរាជអាវុធហត្ថខេត្តបាត់ដំបងចុះត្រួតពិនិត្យនៅតាមបណ្តាទីតាំងខារ៉ាអូខេ ក្លិបកម្សាន្ត ភោជនីយដ្ឋាន និង អាហារដ្ឋាន នានាក្នុងភូមិសាស្រ្តក្រុងបាត់ដំបង ដើម្បីតាមដានការអនុវត្តវិធានសុវត្ថិភាព និងសេចក្តីសម្រេចរបស់រដ្ឋបាលខេត្ត ដើម្បីការពារការឆ្លងរីករាលដាលនៃជំងឺកូវីដ-១៩៕